Derch daut Roode Mäa gonen

Moses säd to daut Volkj: "Fercht junt nich! Stot un seet de Har siene Radunk, dee hee junt vondoag doonen woat; wiels de Ägipta, dee jie vondoag seenen, dee woa jie wiedahan fa emma nich mea seenen! De Har woat fa junt strieden, un jie woaren stell sennen."

Afens wieren de Israeliten veloten, dan beschod Farao daut, daut hee äant haud gonen loten.

"Wie motten äant hinjaraun sennen un äant faustnämen!" Befool hee siene Soldoten. "Lot ons äant trigjholen un sea bestrofen."

Opp Tweeroda-Kjrichwoages met Pied jetrocken, bejleit von Flizboagen-Scheeta, juagen de Ägipta hinjaraun. Daut Volkj Israel reisd no daut Vesproakne Launt. Gott selfst wees äant dän Wajch. Hee jinkj äant bie Dach en eenen Wolkjenstenda un bie Nacht en eenen Fiastenda veropp. Äwadach beschizt de Wolkj äant von de Hett, un enne Nacht dacht de Fiastenda opp äarem Wajch. Wan de Wolkj stelhilt, säd Moses to de Menschen, see sullen loagren un sikj utreiwen. Oba soo schwind aus de Wolkj aunfunk sikj to bewäajen, muaken de Israeliten sikj wada opp dän Wajch.

Un soo, reisden see nom Rooden Mäa un loagaden aum Mäa. See hauden afens Tiet, äare Zelts opp to stalen, aus see daut Jeluts un Rumlen von Heefta hinja sikj hieeden. De Israeliten sagen, woo Farao von de Sied von Ägipten sikj nodad, un doa wieren väle Soldoten bie am, Pieed un Kjrichwoages. Farao wia jekomen, om äant no Ägipten trigj to brinjen.

De Israeliten kjikjten met groote Angst opp de naunkomende Kjrichwoages. Waut sullen see doonen? Väaren wia daut Mäa, hinja äant Farao met siene Armee. De Israeliten wieren sea Angst un fungen aun, Moses to beschuljen: "Wuarom hast du ons en de Wieste jebrocht? Om daut wie stoawen? Daut wia bäta fa ons jewast, de Ägipta to deenen, aus hia to stoawen!"

See weesen äare Ondankboakjeit, endäm see dit säden, oba Moses beruijd äant saunft. Hee säd,

"Siet nich Angst! Vondoag woa jie seenen, woo majchtich ons Gott es! De Har woat fa junt strieden un jie brucken bloos stell sennen!"

Un dan passieed waut sea Besondret! De Wolkjenstenda, dee Israel jeweenlich äwadach veropp jinkj un äant dän Wajch wees, bewäajd sikj nu un stunt tweschen de Israeliten un de Armee von Ägipten. De Ägipta sagen met eenmol eene dichte Waunt von Wolkjen ver sikj. See wieren vollens vewert, aulsoo befool Farao äant to luaren, bat sikj de Wolkj opphoof.

De Wolkj wia aun de Sied von de Ägipta soo diesta, aus dee aun de aundre Sied dach wia, om dän Wajch fa daut Volkj Israel to bedachen. De Israeliten wia een bätje Moot jemoakt. Oba waut sullen see nu doonen? Aule kjikjten hopninjsvoll opp no Moses. Un dan säd Gott to am:

"Häw dienen Stock opp un strakj diene Haunt ut äwa daut Mäa, soo daut de Israeliten opp drieeje Ieed derch daut Mäa gonen kjennen."

Moses stunt aum Mäa un hoof sienen Oarm äwa daut Wota. Daut Mäa wort schumich, de Wint funk aun to pusten un daut pust emma stoakja. De Wint wia soo stoakj, daut dee daut Wota to Sied blosd. Medden em Mäa formd sikj eene Striep drieeje Ieed. Dan sagen de Menschen eenen Wajch doa derch, met eene riesje Wotawaunt opp beid Sieden, de vom stoakja Wint jehoolen wort. Gott haud een Wunda vollbrocht! De Israeliten äare Moot kjeem trigj. Aule Famieljes eena no däm aundren foljden Moses, de äant opp däm feichten Mäaresgrunt em Mäa verwoaz leid.

Aus de Wolkj langsom ver de Ägipta noppjinkj, fungen see aun, äare Pieed no to joagen. See spooden sikj verwoaz, aus see dän Wajch derch daut Mäa sagen. Boolt fungen de Räda von äare Kjrichwoages aun em nauten Saunt stäakjen to bliewen, oba Farao dreef siene Armee wilt wieda un wieda verwoaz. Äwadäm muaken aule Israeliten daut no de aundre Sied. Moses dreid sikj no daut Mäa un leet sienen Stock rauf. Plazlich leet de Wint no un daut Mäawota schäld trigj. De Israeliten kjikjten sea opp daut Mäa, doch von de Ägipta wia nuscht to seenen. Bloos een poa Bieta von äare Kjrichwoages wieren äwa jebläwen un schwommen em Wota.

Aule Israeliten freiden sikj un sungen toop met Moses een triumfierent Leet,

"De Har es miene Krauft un Harlichkjeit. Hee es miene Radunk jeworden. Hee es ons Gott, un ekj woa am eewich lowen!"