En de Sklowarie

De Midianita vekoften am en Ägipten aun Potifar, däm Farao sien Aunjestalda...

Een Dach schekjt Jakob Josef no siene Breeda, dee de Häaden weiden deeden. Hee säd to am: "Go un see no, auf met diene Breeda un de Häaden aules en Ordnunk es, un brinj mie Norechten äwa äant." Josef wull jieren de Dinja doonen dee sien Voda haben wull, doawäajen muak hee sikj fuaz opp dän Wajch. Hee neem nich eenen Äsel uk nich eenen Deena met. Hee trock sikj sienen scheenen Rock aun un neem Aufscheet von sienem Voda. Josef socht un socht no siene Breeda un troff schlieslich eenen Maun, dee am säd, wua siene Breeda met de Häaden wieren. Aus de Breeda am von een Enj auf sagen, säden see to eenaunda: "Hia kjemt dee Dreema! Lot ons am dootmoaken un en een Loch schmieten un dan sienem Voda sajen, daut een willet Tia am en Stekja jeräten haft. Dan woa wie seenen, waut ut siene Dreem woat."

Aulsoo, aus Josef no äant kjeem, neemen see am faust. Oba Ruben, de elsta Brooda, säd:

"Jie sellen am nich dootmoaken, lot ons nich Bloot vejeeten. Well wie am enne Städ en dit Loch hia en de Wieste schmieten." Ruben plond, Josef ut de Gruft to raden un am no sienem Voda trigjschekjen. De Breeda worden sikj eenich, Josef nich doot to moaken. Sooboolt hee no äant kjeem, trocken see am sienen bunten Rock ut. Dan wort Josef kloa, waut siene Breeda am aundoonen wullen. Hee road bettalich un prachad äant, am gonen to loten un no sienem Voda loten trigjgonen, oba see horchten nich no am, wiels äare Hoaten bees wieren.

See schmeeten Josef en een deepet Loch. Doa lieech hee, meed, darschtich un hungrich. Sien Hoat bruak bie däm Jedanken, daut hee sienen Voda veleicht niemols wada seenen wudd.

Onen opp Josef sien Roaren un Stänen to achten, saden sikj de grausome Breeda han, om to äten. Un dan sagen see eene Grupp reisende Haundelsmana, dee wieetvollet Boomzieropp, Balsameelj un aundre Sachen no Ägipten fieeden. Juda, eena von de Breeda, roopt ut,

"Ekj hab eene Iedee! Dise Karawan es opp däm Wajch no Ägipten. Well wie Josef to de Sklowarie vekjeepen! Dan bruck wie am nich dootmoaken, wiels hee woat dan wiet wajch sennen."

Aus de Karawan noda kjeem, randen de Breeda no de Haundelsmana.

"Wie wellen junt eenen Sklow vekjeepen. Hee es een strauma Jung, säwentieen Joa oolt, jesunt un stoakj. Jie kjennen am en Ägipten fa eenem gooden Priess vekjeepen un jie woaren zimlich Jewenst doavon haben."

Josef siene Breeda trocken am met eenem Strank ut daut Loch. Nodäm see Josef unjasocht hauden, koften am de Hendla fa twintich Selwastekja.

No ne jewesse Tiet brochten de Breeda Jakob, äaren Voda, Josef sienen bunten Rock, daut en daut Bloot von eene junge Kos jedukt wia, un säden to am, daut een willet Tia am oppjefräten haud.

Jakob truad väle Doag om sienen Lieblinkjs-Sän. Un nuscht kunn am en siene Trua treesten.