Josef siene Dreem

Israel leewd Josef mea aus aul siene aundre Säns ...

Jakob haud twalw groote Säns. Bloos sien jinjsta Sän Benjamin wia noch een nata Jung. Jakob siene Fru Rahel storf bie de Jeburt von Benjamin. De Sän von Rahel, Josef, wia ella aus Benjamin un aul een Jugentlicha. Hee leewd sienen Voda un jehorcht am.

Jakob siene tieen elre Säns heeden de Schop- un Kosenhäaden. Waut see deeden, wia foaken orrajcht un daut muak äaren Voda nich froo.

Josef wort vedrislich, aus hee sach, daut see nich daut Rajchte deeden, un hee vetald sienem Voda doavon. Josef sien Benämen muak siene Breeda sea doll, soo daut see am foaken ruchloos behaundelden. Waut Jakob von siene Sied deed, wia faulsch un ojjerajcht siene elre Säns jäajenäwa, wiels hee Josef mea Leew bewees aus äant. Daut reizt äant to Aufgonst un Hot en äare Hoaten.

Een Dach befool Jakob siene Deena, Josef eenen besondasch scheenen bunten Rock to moaken. Kjeena von Jakob siene Säns haud soonen Rock aus daut. Daut veuasoakt noch jratre Aufgonst mank de Breeda.

Daut wudd foaken passieren, daut Josef butajeweenelje Dreem haud. Een Dach haud hee eenen Droom, daut hee met siene Breeda Goawen oppe Stap bunk. Un siene Breeda äare Goawen neijden sikj aule ver siene Goaw. Josef wia zimlich äwarauscht un vetald siene Breeda von däm Droom.

See worden sea doll un säden: "Jleefst du, wie woaren ons die unjadon stalen?"

Boolt haud Josef noch eenen sondaboaren Droom. De Sonn, de Mon un alw Stierns neijden sikj ver am dol. Dis Droom äwarauscht am noch mea. Hee vetald sienem Voda un siene Breeda von däm Droom.

Sien Voda wees am trajcht un säd: "Denkjst du werkjlich, daut ekj de Sonn sie, de Mon diene Mutta un de alw Stierns diene Breeda un daut wie woaren komen om ons ver die to bekjen?"

Jakob dannoch, hild disen Droom emdenkj. Josef siene Breeda hausten am noch mea un wieren am aufjenstich: 'Josef es to stolt un denkjt, daut hee werkjlich waut Besondret es. Na', dochten see, 'wie woaren am eene Lekzion jäwen!'