Шебалык падыша аял

Сулаймандын даңкы жана анын кооз имараттары жөнүндөгү кептер жердин эң алыскы бурчтарына чейин жеткен. Адамдар кереметтүү ийбадаткананы көрүү үчүн жана Сулаймандын накыл сөздөрүн угуу үчүн Иерусалимге келип жатышты. Алардын арасында Шебалык падыша аял да болгон.

Ал аял абдан бай болгон. Муну Сулайман падышага алып келген белектеринен эле билүүгө болот эле. Төөлөр менен кымбат баалуу, жыпар жыттуу заттарды, алтын жана асыл таштарды алып келди. Көптөгөн кулдар жол бою бул байлыктарды кайтарып келишкен.

Сулайман атактуу мейманды падышалык даражада коноктоду. Шеба ханышасы ага ар кандай суроолорду берип, жүрөгүндө болгон бардык нерсе тууралуу сүйлөштү. Сулайман анын бардык суроолоруна жооп берди, ага түшүндүрө албай калган эч нерсе болгон жок.

Шеба ханышасы Сулайман курган үйдү, анын тамак-ашын, кулдарынын турак-жайын, кийимдерин жана Теңирдин ийбадатканасында чалган бүтүндөй өрттөлүүчү курмандыктарын көрүп, анын акылмандыгына ынанып, кубанганын жашырган жок.

Ал толкунданып:

- Сенин акылмандыгың, байлыгың жөнүндө укканым туура экен, бирок мага жарымын да айтышпаптыр! Сенин даанышманың жана иштериң мен уккандардын баарынан алда канча жогору экен.

Сага ырайым кылган жана сени падыша кылган Теңирге алкыш болсун! Ал муну Ысрайылды түбөлүк сүйгөндүктөн жасады!