Жесір әйелдің баласының қайта тірілуі

Біраздан кейін Иса Ғалилеядағы Наин атты қалаға барды. Оған шәкірттері және көптеген адам еріп жүрді. Иса қала қақпасына жақындаған кезде жұрт біреудің мәйітін қабірге жерлеуге алып шығып келе жатты. Бұл – бір жесір әйелдің жалғыз ұлы болатын. Қаладан жесірдің қайғысына ортақтасқан көп халық ілесіп шықты.

Иеміз Иса әйелді көргенде, оған жаны ашып:

–Жыламаңыз! – деп жұбатты.

Содан Ол жақындап барып, табытқа қолын тигізді. Табыт көтергендер тоқтағанда, Иса:

– Балам, саған айтамын, түрегел! – деді.

Сонда өлген жігіт түрегеліп отырып, сөйлей бастады! Бұл керемет болды! Иса оны шешесіне табыс етті. Соны көргендердің барлығы бір сәтке үндемей қалды, жұрттың бәрін үрей биледі. Содан соң олар: «Арамыздан ұлы Пайғамбар шықты!», «Құдай өз халқына мейірім көрсетуге келді!», – деп Құдайды мадақтады.

Адамдар Исраилдің Құдайын дәріптеп, мадақтап жатты. Иса туралы осындай хабар бүкіл Яһуди аймағына және барлық төңірекке тарап кетті.