Әйсаниң асманға көтирилиши

Тирилгән Қутқазғучи, Рәб Әйса шагиртлири билән учришип сөһбәтләшкән күнләр немә дегән әҗайип болған. Лекин бу күнләр мәңгү болалматти. Әйса асманға Өзиниң Атисиға қайтиш керәк еди.

Зәйтун теғи жиғилиш үчүн яхши җай болған, шуңа Әйса у йәргә Өзиниң достлирини елип кәлди. Шагиртларниң көңли йерим еди. Улар Әйсаниң пат йеқинда кетидиғанлиғини билгән. Өтүп кетиш һейтидин қириқ күн өткән еди.

- Көңлүңларни йерим қилмаңлар, - деди Әйса, - Мән асманға Атамниң қешиға кәтсәмму, Мән силәр билән болимән. Силәр Мән тоғрилиқ болған Хуш хәвәрни дунияниң булуң-пушқақлириғичә елип маңғандиму Мән Муқәддәс Роһ арқилиқ шу йәрдиму силәр билән биллә болимән. Чүнки Мән силәргә талай қетим ейтқанғу: Мән асманға көтирилгәндә силәргә Ярдәмчини әвәтимән.

Шагиртлар немә дәрини билмәй Устазиға қарап турди. Әйса болса:

- Йәһия адәмләрни суға чөмүлдүрди. Буниң арқилиқ адәмләр өзиниң йеңи һаят яшашни халайдиғанлиғини көрсәтти. Муқәддәс Роһ мана мошундақ ишләйду. У силәрни йеңи адәм қилип силәргә хуш хәвәр ейтидиғанға күч бериду. Мән Өзәм Муқәддәс Роһ арқилиқ силәрни йетәкләймән. Муқәддәс Роһ арқилиқ силәр Мениң билән мунасивәттә болуп, Мени чүшинип яхши көридиған болисиләр. Силәр Худадин күч-қудрәт қобул қилип һәммә йәрдә Мениң тоғрилиқ ейтидиған болисиләр. Авал Йерусалимда, андин пүтүн Исраилда вә ахири пүтүн дунияда, - деди.

Андин У қоллирини асманға көтирип шагиртлирини берикәтлиди вә туюқсиз йәрдин көтирилишкә башлиди! У булутта йоқап кәткичә асманға көтирилди. Улар Әйса билән бундақ хошлишимиз дәп ойлимиған. Бундақ иш кимниңму ойиға келәтти? Әйса Асмандики Атисиға һәммисиниң көз алдида көтирилип кетиду! Һазир У Атиси билән көрүнмәйдиған башқа бир йәрдә.

Улар таң қалған һалда асманға қарап туруп қалди. Әнди немә қилиш керәк?

Шу вақитта шагиртларниң алдида пақирап турған аппақ кийимләрдә икки адәм пәйда болди. Булар Периштәләр еди. Улар Әйса йәр-йүзигә йәнә қайтип келиду дәп ейтти. Уларниң ейтишичә, У иккинчи қетим кәлгинидә Бовақтәк әмәс, бәлки күч-қудрәт вә шөһрәт билән келиду. Әйса иккинчи қетим кәлгинидә, Сотчи вә Һәммигә қадир Падишадәк келиду. У вақитқичә У ишәнгүчиләрниң қәлбидә яшайду вә асманда һөкүмранлиқ қилиду.

Шагиртлар Әйсаниң ахирида уларға немә дегәнлигини ядида сақлавелип хошаллиқта Йерусалимға қайтип кәтти.