ТУМО БЕИМУ̊НИ
Китоби Муқадас, Йуано «Инҷил», 20 боб, 24-29 ойатен
Исойанд йи х̇огирд Тумо ну̊м вуд. Ик wи wахтанд Худоwанд wев дига х̇огирденард зойир ца сутху Ху захмийени wевард ца дивих̇т, Тумо wев қати навуд. Wам йига рӯзен wи ох̇ногу̊н дар борайи Исо зинда̄сид wирд нақл чӯд, ам. Амо йуйи ху ка̄л ҷумбентху, лу̊ди: «Wуз тама га̄пенард боwар чӣдоw нава̄рδӣм. Wузум ту̊нец ху δуст тар Wи захмийен наδоδҷ, диста боwар накинум».
Тумота «беиму̊н» лу̊вен, ду̊н ҷа̄т йуйи лу̊д иде̂, ту̊неци хубаϑ Исо наwӣнч, боwарта наких̇т. Тумойи хойих̇ чӯд ху δуст ик тар wев захмийен δӣд иде̂, ме̂х қатийен Исо δустен ку̊ɣʒ ца чӯдат, неза̄ қатийенга Wи қӣчанд ца δод. Умӯман, Тумойи бойад ху цем қати wӣнчатху, ху δустгайи тар wев захмийен δоδҷатху, та̄ми боwар чӯҷат.
Wа̄δ х̇огирденен ба̄ди йи афта̄ во йи ҷонди ҷа̄м сат. Исо во пироки ҷиноw йакбораϑ wев пиронди пеδо сутху, салу̊ми wевард лу̊д: «Осойах̇ вийет!»
Ба̄ди Исо ху δустен тар Тумо хез чӯдху, лу̊ди: «Тумо, йима Му захмийен, ху δуст тар мев δа! Беиму̊н ма̄вийат, боwар кин, Хуδойард боwари δа!»
Тумо аз ху беиму̊нийат аз ху га̄пен х̇арманда̄ сут, амо wи ме̂рат маба̄т тар зиндасуδҷин Наҷотδа̄δӣҷ соф лапди сутху, Исо поδенарди ху пите̂wдху, иму̊ни Wирд вӯд. Ба̄д wи садо мис лаɣʒа̄ чӯдат, лу̊ди: «Йо му Худоwанд, Йо му Хуδой!»
Исо х̇огирденен во ба̄ди wах̇т рӯз чӣданд ҷа̄м сат, Тумо мис wев қати вуд. Дивийенен қулф вад, амо Исо во wев хезанд озир сутху, лу̊ди: осойах̇ вийет ! Ба̄ди Тумойард лу̊д: ху ангих̇т ваху Му δустенти риби;ху δуст Му пе̂рʒенти риби; беиму̊н ма̄вийат, боwар кин.
Тумойи Wирд ҷаwоб δод: «Йо му Худоwанд, йо му Хуδой!»
Йуано «Хушхабар» 20:26-28
САWОЛЕН
1) Тумойи ху беиму̊ни цара̄нг дивих̇т?
2) Чӣзард аз wи «беиму̊н Тумо» лу̊вен?
3) Исо аз Тумо норозӣ вудо?