ВОХУРИ АМОУС ПУ̊НДТИ

Йи рӯзен Исойанд δу х̇огирд а̄м мотат, а̄м хафа̄йаϑ аз Ерусалӣманд тар Амоус ну̊м х̇а̄р тойд. Wа̄δен дар борайи Исо анҷӣвдоwат, Wи мӣдоwат, дар борайи wи холи қа̄бар нақл чӯд.

Wа̄δен фук wахт Исо да̄мти тойдат, боwарен чӯд иде̂, Йута Бузург Робар су̊дху, халқта озод ких̇т, амо шич ида Йу мӯд… Амо х̇а̄рард ик дисга га̄п-га̄п иде̂, гуйо Исо во зинда̄ суδҷ... Йид хабар wев δорδти ғалч сут.

Wа̄δен ғал ик ди нақлийанд вадат, йи Мусофир тар wев амро сут. Йид Мусофир Исо вуд, амо Худоwанди дисга чӯд иде̂, wа̄δ х̇огирденен Wи нафа̄мт.

Йў йила̄в ҷой wев қабатанд тӯйдху, ба̄ди пех̇цт wев:

«Тамата дар борайи чӣз нақлийет? Wуз ца чисум тамет арчӣзца лап хафа̄йат малол»Wа̄δен ба̄д Wирд ҷаwоб δод: «Ту бағер нафа̄ми ик мев рӯзен тар Ерусалӣм чӣз га̄п вуд!»

Ба̄ден wа̄δ х̇огирден дар борайи ик wев wоқийаен иде̂, охиру̊н рӯзенен ца вад, Wирден нақл чӯд. Wа̄δен ху нақл тайор чӯдху, войен қарораϑат хафа̄йаϑ ху пу̊нд даwу̊м δод. Исойи wев га̄пен ниғух̇тху, йила̄вгайен тойдху, ба̄ди Хубаϑ wевард лу̊д: «Нахо тама ақу̊нийаϑ нафа̄мет иде̂, Муқадас Нивишчинанд дар борайи чӣз га̄п тӣзд? Дийет ца фа̄мчат, тамет пас ик ди мис фа̄мчат иде̂, ику арчӣз Нивишчинанд ца вуд, йу бойад иҷро су̊д. Масе, Хуδой Пуци бойад азобат қӣни wӣнчатху, мардум гунойен ҷа̄ти Ху ҷу̊н сипорчатху, ба̄д зинда̄ суδҷатху пи Хуδой Подх̇ойи тӯйҷат. Дар борайи дийи а̄м Мӯсо лу̊дат, а̄м дига пайғумбаренат, а̄м Забӯр созенанд дар борайи ди йаст».

Йуйи ба̄д аз Нивишчиненанд фана̄ га̄пен wевард лу̊д. Wа̄δен мис йила̄в аз wеванд фа̄мтат, амо хойен пи wев ма̄нӣ баша̄нд нафирӣптат, хойен пайғумбарен га̄пенард боwари наδодат, хойен ринӯх̇т wев. Амо шичен ида фа̄мт! Арчӣз Нивишчинанд ца вуд, йу ақу̊нийаϑ иҷро сут!

Wев Худоwандат wев Молим ик диҷат найат иде̂, аз Рӯм импира̄тур wев халос ких̇т, ат Йу ди ҷа̄т йат иде̂, ла̄к мардум ҷа̄т Ху ҷу̊н сипортху, аз гунойен wев халос ких̇т. Йу банока̄фанд намӯд, ат арра̄нг Нивишчинанд ца вуд, Йу бойад мӣртху во зинда̄ сут. Амо га̄п икедандиди чӣзарден wа̄δ пиройаϑ ди нафа̄мт!

Wа̄δ х̇огирденен wи бегу̊на̄ мусофир ниғух̇тат, wев да̄рδат алам ка̄мди сут.

Амо wа̄δен ғалаϑ мис нафа̄мт иде̂, Йу wев наw амро ча̄й вуд.

Wа̄δен тар Амоус фирӣптху, аwқотхиден Wи мара̄т чӯдху, хойих̇ен чӯд Йу х̇а̄б wев хезанд рист. Йу бегу̊на̄ мусофир розӣ сут. Ба̄ден наw дасторху̊нти ностат Йуйи гарδа̄ зох̇тху, ка̄нди wи чӯдху wеварди да̄кчӯд.

Wев варϑ х̇огирденанд wев байоδ δод иде̂, Исойи мис фук wахт дисга чӯд. Йеданден ба̄д wа̄δ йакбораϑ сарфа̄м сат иде̂, Йу Исо вуδҷ! Wа̄δен аwалаϑ Wи нафа̄мт, амо шичен боwар чӯд иде̂, Йу ақу̊нийаϑ Исо вуδҷ!

Ди wахтанд Исо йакбораδ аз wев пиронди ғайб сут. Wа̄δен цара̄нг пиройаϑ Wи нафа̄мт! Хе̂р ик wи wахтанди Йу wевард Муқадас Нивишчин нақл ца чӯд, wев диленанд рӯх̇нойи пеδо сут! Амо ба̄д аз ди Исо мис wев хезанд ца навуд, wа̄δен ар варϑ хафа̄ навад. Wевард сар асос ику вуд иде̂, Исо зинда̄ ца! Wа̄δен ду̊ндард хуш вад иде̂, хойих̇ен чӯд ик wам рӯзаϑ wев дига х̇огирденард мис дар борайи ди хабар δен. Ба̄ден wитийаϑ ху тайори чӯдху, войен тар Ерусалӣм ик тар wи чӣд гах̇т чӯд иде̂, тарамен йила̄в Исо х̇огирден ҷа̄м ца вад.