Jesus Christus siene Openboarunk aun Johanes

Un hee säd to mie: "Dise Wieed sent tru un woarhauftich, un de heilje Profeeten äa Gott un Har, haft sienen Enjel jeschekjt, siene Deena to wiesen, waut em Korten passieren mott."

"Un kjikj, Ekj kom schwind. Seelich es dee, waut de Wieed von de Profezeiunk en dit Buak helt…" wäa jerajcht es, saul wiedahan jerajcht sennen, un wäa heilich es, saul wiedahan heilich sennen. "Un kjikj, Ekj kom schwind un mien Loon met Mie, eenem jiedren to jäwen, doano aus sien Woakj sennen woat."

Väle von Christus siene Jinja weesen Gott, daut see Tru wieren bat toom Enj un hilden de Kjwälarie un Martiera-Doot ut, wiels see daut Evangelium prädijden. Oba eena von de Apostel, Johanes, wort sea oolt un wia met 90 Joa emma noch Metjliet en de Christen-Vesaumlunk en de Staut Efesus. Am wort nich dootjemoakt, un wan hee uk wäajen sien Gloowen aun Jesus vefolcht wort. Enne Städ wort hee opp de Insel Patmos em Meddelmäa vebaunt. De Insel wia wilt un veloten un daut jratste Poat von de Menschheit dort wieren Jefangne un Wajchta.

Doa, aus daut soo stell wia opp dän Insel, räd Gott to Johanes. Hee säd to am, daut Jesus Kjennich es un selfst wäarent de jewaultmäsje Vefoljunk de Jleewende äare Läwes wudden en siene Henj jehoolen woaren!

En Visionen, en sienem Kopp, wees Gott Johanes uk daut Enj von de Welt. Hee haud twalw Visionen un beschreef dee em latsten Buak von de Bibel – daut Buak von de Openboarunk.

En de latste Vision wees Gott sien Enjel am een wundascheenet Bilt von de Harlichkjeit, dee fa Gott sien Volkj reedjemoakt es. Däm Apostel Johanes wort daut niee Paradies jewäsen, de Riefa vom Läwen, soo kloa aus de reinste Kristal, dee von Gott sienem Troon un vom Laum kjemt, un de Boom vom Läwen aum Riefa.

Doa woat kjeene Sind em Himmel sennen, wiels Jesus Christus de Sind besiecht haft. Doot, Sind un Ongloowen woat daut nich mea jäwen, wiels de Har woat daut aula venichten. Un aule Jerade woaren met Jesus Christus fa emma en daut Himmelrikj rejieren.

De Enjel säd to Johanes, daut aules, waut hee jehieet un jeseenen haud, Woarheit es.

Aum Enj von de Vision säd de Har Jesus selfst to däm Apostel Johanes:

"Ekj sie de Alfa un de Omega, de Aunfank un daut Enj, de Ieeschta un de Latsta … Ekj sie de Wartel un Staum von David, de jlenzenda Morjen-Stiern."

"Ekj kom schwind!" Säd de Har toom Aufscheet.

"Amen!" Auntwuad Johanes.

"Jo, komm, Har Jesus!"